November 18, 2026

سردی کی شدت اور بے گھر انسانیت۔۔۔ آئیے امید کی شمع روشن کریں تحریر: خ۔ح۔شہزاد — دل کی بات

IMG-20261118-WA0181

سردی کی شدت اور بے گھر انسانیت۔۔۔ آئیے امید کی شمع روشن کریں
تحریر: خ۔ح۔شہزاد — دل کی بات
سردیوں کا موسم جہاں صاحبِ حیثیت لوگوں کے لیے گرم لباس، نرم بستروں اور آرام دہ کمروں کا موسم ہوتا ہے، وہیں معاشرے کے ہزاروں ایسے خاندان بھی ہیں جن کے لیے سردی ایک آزمائش بن کر آتی ہے۔ ایسے خاندان جو جھونپڑیوں، کچی بستیوں، فٹ پاتھوں اور عارضی ٹھکانوں میں زندگی گزارنے پر مجبور ہیں۔ ان کے پاس نہ گرم بستر ہیں، نہ مناسب لباس اور نہ ہی سرد ہواؤں سے بچنے کا کوئی مؤثر انتظام۔
ذرا تصور کیجیے! ایک معصوم بچہ جو سرد رات میں پھٹے ہوئے کپڑوں میں اپنی ماں کے ساتھ کسی جھونپڑی میں بیٹھا ہو، ایک بوڑھا شخص جس کے جسم میں سردی برداشت کرنے کی سکت باقی نہ رہی ہو، ایک بے سہارا خاتون جو اپنے بچوں کو اپنی پرانی چادر میں چھپا کر رات گزارنے کی کوشش کر رہی ہو۔ کیا یہ سب ہمارے معاشرے کا حصہ نہیں؟ کیا ان کی تکلیف ہماری توجہ اور احساس کی مستحق نہیں؟
اسلام ہمیں محبت، ہمدردی، ایثار اور خدمتِ انسانیت کا درس دیتا ہے۔ ہمارے دین میں ضرورت مندوں کی مدد کو بڑی فضیلت حاصل ہے۔ نبی کریم ﷺ نے انسانیت کے ساتھ رحم اور بھلائی کا عملی نمونہ پیش فرمایا۔ پھر ہم کیسے اپنے اردگرد موجود مجبور اور بے سہارا لوگوں سے بے خبر رہ سکتے ہیں؟
المصطفیٰ فاؤنڈیشن کا سردیوں کا امدادی مشن
ملک گیر خدمتِ خلق کے مشن پر گامزن المصطفیٰ فاؤنڈیشن ہر سال کی طرح رواں سال بھی اپنے مخیر حضرات، معاونین اور دردِ دل رکھنے والے افراد کے تعاون سے مستحق خاندانوں تک گرم کپڑے، جیکٹس، سویٹرز، جرسیوں، گرم شالوں اور دیگر ضروری ملبوسات پہنچانے کے لیے کوشاں ہے۔
اس مہم کا بنیادی مقصد بے گھر افراد، جھونپڑیوں میں رہنے والے خاندانوں، معصوم بچوں، خواتین، بزرگوں اور محنت کش طبقے کو سردی کی شدت سے محفوظ رکھنے میں اپنا کردار ادا کرنا ہے۔
ہماری اپیل ہے کہ اپنے گھروں میں موجود ایسے گرم کپڑے، جیکٹس، سویٹرز، جرسیوں اور شالوں کو ضائع نہ ہونے دیں جو آپ کے استعمال میں نہیں لیکن کسی ضرورت مند کے لیے سردی سے بچاؤ کا بہترین ذریعہ بن سکتے ہیں۔ نئے یا اچھی حالت میں استعمال شدہ کپڑے بھی اس کارِ خیر میں عطیہ کیے جا سکتے ہیں۔
یاد رکھیے! کسی ضرورت مند بچے کو گرم سویٹر پہنا دینا، کسی بوڑھے کو گرم شال فراہم کرنا یا کسی بے سہارا خاندان کو سردی سے بچانے کے لیے کمبل دینا صرف ایک عطیہ نہیں بلکہ انسانیت سے محبت کا عملی اظہار ہے۔
آئیے! کسی کی سرد رات کو گرم کر دیں۔
المصطفیٰ فاؤنڈیشن تمام مخیر حضرات، تاجروں، صنعت کاروں، سماجی شخصیات، اہلِ خیر اور دردِ دل رکھنے والے افراد سے اپیل کرتی ہے کہ اس مہم میں بڑھ چڑھ کر حصہ لیں۔ آپ کا چھوٹا سا تعاون کسی گھر میں خوشی، کسی بچے کے چہرے پر مسکراہٹ اور کسی بزرگ کے لیے سکون کا باعث بن سکتا ہے۔
ہمیں یقین ہے کہ جب معاشرے کے صاحبِ حیثیت افراد اپنی ذمہ داری محسوس کرتے ہیں تو کوئی بھی مجبور انسان تنہا نہیں رہتا۔
آئیے! ایمان، اتحاد، یقینِ محکم اور خدمت کے جذبے کے ساتھ المصطفیٰ فاؤنڈیشن کا دست و بازو بنیں اور اس سرد موسم میں بے گھر انسانیت کے لیے امید کی کرن بن جائیں۔
عطیات اور رابطہ:
جاز اکاؤنٹ: 03064842711
ایزی پیسہ: 03124842711
رابطہ نمبر: 03124842711
ہیڈ آفس: المصطفیٰ ہاؤس، شمس آباد، جھمرہ روڈ، فیصل آباد۔
المصطفیٰ فاؤنڈیشن — امید کی کرن، خدمتِ انسانیت ہمارا مشن
آئیے! سردی صرف موسم میں رہے، کسی غریب کے وجود اور احساس میں نہیں۔