گورنمنٹ ایلیمنٹری سکول ظفر آباد رنگپوربگھور میں تقریب تقسیم انعامات کاانعقاد خصوصی تحریر: راجہ نورالٰہی عاطف
گورنمنٹ ایلیمنٹری سکول ظفر آباد رنگپوربگھور میں تقریب تقسیم انعامات کاانعقاد
خصوصی تحریر: راجہ نورالٰہی عاطف
تعلیم کسی بھی معاشرے کی ترقی، خوشحالی اور روشن مستقبل کی بنیادی ضمانت ہے۔ جو قومیں اپنے بچوں کی تعلیم و تربیت پر خصوصی توجہ دیتی ہیں، وہی وقت کے ساتھ ترقی کی منازل طے کرتی ہیں۔ اسی سوچ کو عملی شکل دینے کے لیے گورنمنٹ ایلیمنٹری سکول ظفر آباد، رنگپور بگھور میں طلبہ کی حوصلہ افزائی اور ان کی تعلیمی صلاحیتوں کو اجاگر کرنے کے لیے ایک پروقار تقریبِ تقسیمِ انعامات کا انعقاد کیا گیا، جو یقیناً قابلِ تحسین اقدام ہے۔
تقریب میں اسسٹنٹ ایجوکیشن آفیسر ملک محمد امتیاز نسیم نے بطور مہمانِ خصوصی شرکت کی، جبکہ ادارہ ہٰذا کے ہیڈماسٹر ملک عابد اقبال نے تقریب کی صدارت کی۔ اس موقع پر مختلف جماعتوں میں نمایاں پوزیشنیں حاصل کرنے والے طلبہ میں انعامات تقسیم کیے گئے۔ کامیاب طلبہ کے چہروں پر خوشی اور اساتذہ کی جانب سے ان کی حوصلہ افزائی کا جذبہ اس امر کا عکاس تھا کہ تعلیمی میدان میں محنت کرنے والوں کی قدر و منزلت ہمیشہ قائم رہتی ہے۔
طلبہ کی حوصلہ افزائی دراصل ان کے اندر خود اعتمادی، محنت اور آگے بڑھنے کا جذبہ پیدا کرنے کا مؤثر ذریعہ ہے۔ جب کسی طالب علم کی محنت کو سراہا جاتا ہے تو وہ نہ صرف اپنی کارکردگی مزید بہتر بنانے کی کوشش کرتا ہے بلکہ دیگر طلبہ کے لیے بھی ایک مثبت مثال بن جاتا ہے۔ تقریب میں پوزیشن ہولڈر طلبہ کو مستقبل میں بھی محنت، لگن، نظم و ضبط اور مستقل مزاجی کے ساتھ اپنی تعلیمی سرگرمیاں جاری رکھنے کی تلقین کی گئی۔
اس موقع پر اساتذہ کی خدمات بھی قابلِ ستائش ہیں، کیونکہ وہ طلبہ کو صرف کتابی علم ہی نہیں دیتے بلکہ ان کی شخصیت سازی، کردار سازی اور اخلاقی تربیت میں بھی اہم کردار ادا کرتے ہیں۔ کسی بھی تعلیمی ادارے کی کامیابی کا اصل معیار اس کے طلبہ کی علمی قابلیت کے ساتھ ساتھ ان کا کردار، نظم و ضبط اور معاشرے کے لیے مثبت کردار ادا کرنے کی صلاحیت بھی ہے۔
تقریب کی نظامت کے فرائض ٹیچر خالد ندیم راہداری نے احسن انداز میں سرانجام دیے، جبکہ سکول کے اساتذہ اور طلبہ نے بھی بھرپور شرکت کی۔ تقریب کے اختتام پر پوزیشن ہولڈر طلبہ کو مبارکباد دی گئی اور ان کے روشن مستقبل کے لیے نیک خواہشات کا اظہار کیا گیا۔
گورنمنٹ ایلیمنٹری سکول ظفر آباد میں منعقد ہونے والی یہ تقریب اس بات کا خوبصورت پیغام ہے کہ اگر طلبہ کی محنت کو بروقت تسلیم کیا جائے اور انہیں مناسب رہنمائی و حوصلہ افزائی فراہم کی جائے تو وہ مستقبل میں ملک و قوم کا قیمتی سرمایہ ثابت ہو سکتے ہیں۔ ضرورت اس امر کی ہے کہ تعلیمی اداروں میں ایسی مثبت اور حوصلہ افزا سرگرمیوں کا سلسلہ جاری رکھا جائے تاکہ نئی نسل علم، کردار اور قابلیت کے میدان میں نمایاں مقام حاصل کرسکے۔
