ملک محمد اقبال خان سنبل — عوامی خدمت، وضع داری اور دوست نوازی کی روشن مثال
خصوصی تحریر: راجہ نورالہی عاطف
ضلع خوشاب کی سیاسی، سماجی اور عوامی زندگی میں بعض شخصیات ایسی ہوتی ہیں جو اپنے عہدے یا منصب سے نہیں بلکہ اپنے کردار، خلوص، ملنساری اور عوامی وابستگی سے پہچانی جاتی ہیں۔ ملک محمد اقبال خان سنبل بھی ایسی ہی باوقار اور ہر دلعزیز شخصیت ہیں، جنہوں نے اپنی خوش اخلاقی، معاملہ فہمی، دوست پروری اور بے لوث عوامی خدمت کے ذریعے عوامی و سماجی حلقوں میں ایک منفرد مقام بنایا ہے۔
ملک محمد اقبال خان سنبل کی شخصیت کے نمایاں اوصاف میں بردباری، شائستگی، خوش گفتاری، خوش لباسی، ملنساری اور حسنِ اخلاق شامل ہیں۔ وہ ہر شخص سے خندہ پیشانی سے ملتے ہیں اور تعلقات کو نبھانے کے فن سے بخوبی واقف ہیں۔ یہی وجہ ہے کہ ان کا حلقۂ احباب نہ صرف وسیع ہے بلکہ مختلف طبقات اور سیاسی و سماجی حلقوں تک پھیلا ہوا ہے۔ دوستوں کے ساتھ وفاداری اور مشکل وقت میں ان کے شانہ بشانہ کھڑے ہونا ان کی شخصیت کا ایسا وصف ہے جس کی وجہ سے انہیں بجا طور پر “یاروں کا یار” کہا جاتا ہے۔
ملک محمد اقبال خان سنبل نے ضلع خوشاب کی سیاست میں بھی ہمیشہ ایک متحرک اور مثبت کردار ادا کیا ہے۔ وہ سابق ایم این اے سردار شجاع محمد خان بلوچ مرحوم اور سابق ایم پی اے سردار علی حسین خان بلوچ مرحوم کے معتمد ساتھیوں میں شمار ہوتے رہے ہیں۔ آج بھی وہ ممبر صوبائی اسمبلی سردار ظفر خان بلوچ اور سابق ایم پی اے بیرسٹر ملک معظم شیر کلو کے قابلِ اعتماد ساتھیوں میں شامل ہیں۔ ان کے سیاسی روابط محض سیاسی وابستگی تک محدود نہیں بلکہ وہ باہمی احترام، مشاورت اور اعتماد کے رشتے کو ہمیشہ اہمیت دیتے ہیں۔
ملک محمد اقبال خان سنبل کی ایک نمایاں خوبی یہ بھی ہے کہ وہ علاقائی سیاسی گروہوں کو ایک پلیٹ فارم پر اکٹھا کرنے کے لیے دیگر مقامی عمائدین کے ہمراہ اپنا کردار ادا کر رہے ہیں۔ ان کی کوشش رہی ہے کہ سیاسی اختلافات کو ذاتی دشمنی نہ بننے دیا جائے اور علاقائی مسائل کے حل کے لیے اجتماعی سوچ کو فروغ دیا جائے۔ ان کا یہ طرزِ عمل اس امر کا عکاس ہے کہ وہ سیاست کو محض اقتدار یا ذاتی مفاد کا ذریعہ نہیں بلکہ عوامی مسائل کے حل اور علاقے کی ترقی کا وسیلہ سمجھتے ہیں۔
عوامی فلاح و بہبود کے حوالے سے بھی ملک محمد اقبال خان سنبل کی خدمات قابلِ ذکر ہیں۔ وہ اپنے علاقے کی تعمیر و ترقی کے حوالے سے ایک واضح وژن رکھتے ہیں اور بالخصوص پسماندہ، دور افتادہ مواضعات اور ڈیرہ جات کے رہنے والوں کی خوشحالی کے خواہاں ہیں۔ ان کے نزدیک ترقی کا حقیقی مفہوم یہی ہے کہ اس کے ثمرات معاشرے کے ہر طبقے اور ہر علاقے تک پہنچیں۔
بطور چیئرمین عشر و زکوٰۃ کمیٹی ملک محمد اقبال خان سنبل نے مستحق، نادار اور غریب افراد کی مالی معاونت کے لیے اہم کردار ادا کیا۔ تاہم ان کی خدمتِ خلق کا دائرہ کسی سرکاری یا انتظامی منصب تک محدود نہیں رہا۔ وہ آج بھی ذاتی حیثیت میں ضرورت مندوں کی مدد اور غرباء پروری کو اپنا اخلاقی فرض سمجھتے ہیں۔ ان کا یہ جذبہ انہیں عوام کے دلوں کے قریب کرتا ہے۔
یہی وجہ ہے کہ معاشرے کے کمزور، محروم اور مستحق طبقات ملک محمد اقبال خان سنبل کو اپنی آواز اور اپنی امنگوں کا ترجمان سمجھتے ہیں۔ ان کی شخصیت کا سب سے خوبصورت پہلو یہ ہے کہ وہ کسی کی مدد کرتے ہوئے تشہیر کے بجائے خاموش خدمت کو ترجیح دیتے ہیں۔ ان کے نزدیک کسی ضرورت مند کے چہرے پر مسکراہٹ لانا ہی حقیقی کامیابی ہے۔
ملک محمد اقبال خان سنبل کا شمار ضلع خوشاب کے معروف ٹرانسپورٹرز میں بھی ہوتا ہے۔ کاروباری میدان میں ان کی کامیابی ان کی معاملہ فہمی، محنت اور لوگوں سے اچھے تعلقات کا مظہر ہے۔ انہوں نے کاروبار کے ساتھ ساتھ سماجی تعلقات اور عوامی خدمت کے تقاضوں کو بھی احسن انداز میں نبھایا ہے۔
درحقیقت ملک محمد اقبال خان سنبل کی شخصیت مختلف خوبصورت اوصاف کا حسین امتزاج ہے۔ سیاست میں متحرک، سماج میں مقبول، دوستوں کے لیے مخلص، ضرورت مندوں کے لیے دستِ شفقت اور اپنے علاقے کی ترقی کے لیے پُرعزم—یہ تمام پہلو ان کی شخصیت کو منفرد بناتے ہیں۔
ایسی شخصیات کسی بھی علاقے کا قیمتی اثاثہ ہوتی ہیں جو ذاتی مفادات سے بالاتر ہو کر اجتماعی بھلائی، باہمی رواداری اور عوامی خدمت کے فروغ کے لیے اپنا کردار ادا کرتی ہیں۔ ملک محمد اقبال خان سنبل نے اپنے حسنِ اخلاق، وضع داری، وسیع ظرفی اور خدمتِ خلق کے ذریعے عوامی زندگی میں اپنی ایک الگ پہچان قائم کی ہے۔
ملک محمد اقبال خان سنبل کی شخصیت اس حقیقت کی گواہی دیتی ہے کہ عہدے اور منصب وقتی ہوتے ہیں، مگر اچھا کردار، مخلص تعلقات اور بے لوث خدمت وہ سرمایہ ہیں جو انسان کو لوگوں کے دلوں میں ہمیشہ زندہ رکھتے ہیں۔
