2026 کا پہلا جمعہ — عشقِ رسول ﷺ، نماز اور نجات کا راستہ
2026 کا پہلا جمعہ — عشقِ رسول ﷺ، نماز اور نجات کا راستہ
ہم مسلمان ہیں، اور ہمارا ایمان اس اٹل یقین پر قائم ہے کہ اللہ تعالیٰ ایک ہے اور حضرت محمد ﷺ اللہ کے آخری نبی اور رسول ہیں۔ ایمان صرف زبانی اقرار کا نام نہیں بلکہ دل کی گہرائیوں میں رچ بس جانے والی وہ کیفیت ہے جو انسان کے ہر عمل، ہر سوچ اور ہر فیصلے کی رہنمائی کرتی ہے۔
رسول اکرم ﷺ سے محبت ایمان کی بنیاد ہے۔ جب تک حضور ﷺ کی ذاتِ اقدس سے محبت دنیا کی ہر چیز، حتیٰ کہ ماں باپ، بیوی، بچوں اور اپنی جان سے بھی بڑھ کر نہ ہو جائے، اس وقت تک انسان حقیقی معنوں میں عاشقِ رسول ﷺ کہلانے کا حق دار نہیں ہو سکتا۔
قرآن مجید کی روشنی میں عشقِ رسول ﷺ
اللہ تعالیٰ قرآن مجید میں ارشاد فرماتے ہیں:
قُلْ إِن كَانَ آبَاؤُكُمْ وَأَبْنَاؤُكُمْ وَإِخْوَانُكُمْ وَأَزْوَاجُكُمْ وَعَشِيرَتُكُمْ وَأَمْوَالٌ اقْتَرَفْتُمُوهَا وَتِجَارَةٌ تَخْشَوْنَ كَسَادَهَا وَمَسَاكِنُ تَرْضَوْنَهَا أَحَبَّ إِلَيْكُم مِّنَ اللَّهِ وَرَسُولِهِ…
(سورۃ التوبہ: 24)
ترجمہ:
کہہ دیجیے! اگر تمہارے باپ، بیٹے، بھائی، بیویاں، رشتہ دار، تمہارا کمایا ہوا مال، وہ تجارت جس کے نقصان سے تم ڈرتے ہو، اور وہ گھر جنہیں تم پسند کرتے ہو، اللہ اور اس کے رسول ﷺ اور اس کی راہ میں جہاد سے زیادہ محبوب ہیں، تو پھر انتظار کرو…
یہ آیت ہمیں واضح پیغام دیتی ہے کہ ایمان کی تکمیل عشقِ رسول ﷺ کے بغیر ممکن نہیں۔
حدیثِ مبارکہ: حضرت عمر فاروقؓ کا واقعہ
احادیثِ مبارکہ میں آتا ہے:
عَنْ عَبْدِ اللَّهِ بْنِ هِشَامٍ، قَالَ كُنَّا مَعَ النَّبِيِّ ﷺ وَهُوَ آخِذٌ بِيَدِ عُمَرَ بْنِ الْخَطَّابِ، فَقَالَ لَهُ عُمَرُ: يَا رَسُولَ اللَّهِ لَأَنْتَ أَحَبُّ إِلَيَّ مِنْ كُلِّ شَيْءٍ إِلَّا مِنْ نَفْسِي، فَقَالَ النَّبِيُّ ﷺ: لَا، وَالَّذِي نَفْسِي بِيَدِهِ، حَتَّى أَكُونَ أَحَبَّ إِلَيْكَ مِنْ نَفْسِكَ، فَقَالَ لَهُ عُمَرُ: فَإِنَّهُ الْآنَ وَاللَّهِ لَأَنْتَ أَحَبُّ إِلَيَّ مِنْ نَفْسِي، فَقَالَ النَّبِيُّ ﷺ: الْآنَ يَا عُمَرُ
(صحیح بخاری)
یہ وہ مقام ہے جہاں حضرت عمر فاروقؓ ایمان کی اس معراج پر فائز ہوتے ہیں جسے رسول اللہ ﷺ نے قبول فرمایا۔ یہی وہ مقامِ محمود ہے جس کی ہر مومن کو تمنا ہونی چاہیے۔
نماز — دین کا ستون اور جنت کی کنجی
نماز دینِ اسلام کا بنیادی ستون اور جنت کی کنجی ہے۔ قرآن مجید میں اللہ تعالیٰ فرماتے ہیں:
أَقِيمُوا الصَّلَاةَ وَآتُوا الزَّكَاةَ وَارْكَعُوا مَعَ الرَّاكِعِينَ
(سورۃ البقرہ: 43)
نماز صرف چند حرکات کا نام نہیں بلکہ یہ جسم، روح اور فکر کی تطہیر ہے۔ جیسے ڈیٹول جسم کو جراثیم سے پاک کر دیتا ہے، ویسے ہی نماز انسان کو گناہوں کی آلودگی سے پاک کرتی ہے۔
رسول اللہ ﷺ نے فرمایا:
أَوَّلُ مَا يُحَاسَبُ بِهِ الْعَبْدُ يَوْمَ الْقِيَامَةِ الصَّلَاةُ
(سنن ترمذی)
قیامت کے دن سب سے پہلے نماز کے بارے میں سوال کیا جائے گا۔
جمعہ کی اہمیت
جمعہ مسلمانوں کا عظیم دن ہے۔ حدیثِ مبارکہ میں ہے:
خَيْرُ يَوْمٍ طَلَعَتْ عَلَيْهِ الشَّمْسُ يَوْمُ الْجُمُعَةِ
(صحیح مسلم)
آج 2026 کا پہلا جمعہ ہے۔ ہر مسلمان پر لازم ہے کہ صاف ستھرا ہو کر، خوشبو لگا کر، عاجزی و خشوع کے ساتھ نمازِ جمعہ ادا کرنے جائے۔
دعا — فرد سے امت تک
ہمیں چاہیے کہ:
اپنے لیے دعا کریں
اپنے والدین کے لیے دعا کریں
پوری امتِ مسلمہ کے لیے دعا کریں
اور پاکستان کی حفاظت، سلامتی اور استحکام کے لیے خصوصی دعا کریں
اللہ تعالیٰ ہمارے ملک کو امن کا گہوارہ بنائے، ہمیں سچا مسلمان اور حقیقی عاشقِ رسول ﷺ بننے کی توفیق عطا فرمائے۔
آمین یا رب العالمین
✍️ کالم نگار:
محمد سلیم سلیمی
بیورو چیف ENN
بیورو چیف BNN
چیف رپورٹر لاہور رنگ ڈیلی نیوز
اسپیشل رپورٹر تعمیر وطن نیوز (لاہور)
بیورو چیف تجدید پاکستان ڈیلی نیوز لاہور
بیورو چیف پبلش نیوز لاہور
📞 فون نمبر: 0321-7117156
📅 تاریخ: جمعہ، 2 جنوری 2026
