فلسطین میں جاری انسانیت سوز مظالم پر شورکوٹ پراپرٹی یونین کی شدید الفاظ میں مذمت
فلسطین میں جاری انسانیت سوز مظالم پر شورکوٹ پراپرٹی یونین کی شدید الفاظ میں مذمت
ہم، شورکوٹ پراپرٹی یونین کے تمام عہدیداران بالخصوص یونین کے صدر جناب آصف سروہی، سیکرٹری جنرل جناب صابر ہاشمی اور چیئرمین جناب چوہدری اکرم تگہ، فلسطین کے مظلوم عوام پر ہونے والے بہیمانہ، ظالمانہ اور ناقابلِ بیان مظالم کی شدید ترین الفاظ میں مذمت کرتے ہیں۔
فلسطین کی سرزمین پر جو خون کی ہولی کھیلی جا رہی ہے، اس میں معصوم بچوں، عورتوں، بزرگوں اور نہتے شہریوں کو نشانہ بنایا جا رہا ہے۔ اسرائیلی جارحیت نے ظلم و بربریت کی تمام حدیں پار کر دی ہیں۔ اسکول، اسپتال، عبادت گاہیں اور رہائشی عمارات کو ملبے کا ڈھیر بنا کر انسانی اقدار کو روند دیا گیا ہے۔ یہ نہ صرف بین الاقوامی قوانین بلکہ ہر انسان دوست ضمیر پر کھلا طمانچہ ہے۔
فلسطین اب آخری سانسیں لے رہا ہے، جو کہ ڈیڑھ ارب مسلمانوں کے لیے ڈوب کر مر جانے کا مقام ہے۔
ہم فلسطینی عوام کی جرات، استقامت اور قربانیوں کو خراجِ تحسین پیش کرتے ہیں، جو دشمن کے ہر ظلم کے باوجود اپنے حقِ آزادی اور اپنے مقدس وطن کے دفاع کے لیے سینہ سپر ہیں۔ ان کی قربانیاں رہتی دنیا تک حریت کی علامت رہیں گی۔
افسوس کے ساتھ کہنا پڑتا ہے کہ امتِ مسلمہ کی قیادت اس ظلم عظیم پر مجرمانہ خاموشی اختیار کیے ہوئے ہے۔ عرب حکمرانوں کی مصلحت پسندی اور عالمی سامراجی طاقتوں کے تلوے چاٹنے کی روش نے فلسطینیوں کو تنہا کر دیا ہے۔ مسلم ممالک کی افواج، وسائل اور اتحاد اس وقت کہاں ہیں جب غزہ جل رہا ہے اور بیت المقدس خون میں نہایا ہوا ہے؟
ہم حکومتِ پاکستان سے پرزور مطالبہ کرتے ہیں:
1. فوری طور پر اسرائیل سے سفارتی تعلقات کے کسی بھی امکان کو ہمیشہ کے لیے ختم کیا جائے۔
2. فلسطینی عوام کی عملی مدد کے لیے واضح حکمتِ عملی اپنائی جائے، صرف زبانی مذمت نہیں بلکہ معاشی، سیاسی اور اخلاقی تعاون کو مضبوط بنایا جائے۔
3. اقوامِ متحدہ اور دیگر بین الاقوامی فورمز پر فلسطین کے حق میں جارحانہ سفارتی مہم شروع کی جائے۔
4. فلسطین کاز کے لیے عوامی بیداری کی مہم چلائی جائے اور پاکستانی میڈیا کو پابند کیا جائے کہ وہ اسرائیلی مظالم کو اجاگر کرے۔
شورکوٹ پراپرٹی یونین پوری پاکستانی قوم کے ساتھ مل کر فلسطین کے مظلوم عوام کے شانہ بشانہ کھڑی ہے۔ ہم نہ صرف ان کے لیے آواز بلند کرتے رہیں گے بلکہ اپنے ہر فورم پر فلسطینی کاز کے لیے جدوجہد جاری رکھیں گے۔
ہم اس بات کا اعلان کرتے ہیں کہ اسرائیلی مظالم پر ہماری خاموشی گناہ ہے، اور ہم کسی صورت اس جرم میں شریک نہیں ہوں گے۔
فلسطین کے مظلوم عوام، ہم تمہارے ساتھ ہیں!
شورکوٹ پراپرٹی یونین
صدر: آصف سروہی
سیکرٹری جنرل: صابر ہاشمی
چیئرمین: چوہدری اکرم تگہ