سکھر: جیئے شاہ ٹاؤن کے نصیر چنا محلے میں بنیادی سہولیات کی عدم فراہمی پر علاقہ مکینوں کا احتجاج، یوسی چیئرمین کے خلاف نعرے بازی

سکھر: جیئے شاہ ٹاؤن کے نصیر چنا محلے میں بنیادی سہولیات کی عدم فراہمی پر علاقہ مکینوں کا احتجاج، یوسی چیئرمین کے خلاف نعرے بازی

نکاسی آب کا نظام درہم برہم، سڑکیں، راستے اور نالیاں خستہ حالی کا شکار، منتخب نمائندے ووٹ لینے کے بعد مسائل حل نہیں کرتے، مظاہرین؛ متعلقہ حکام سے فوری نوٹس لینے اور بنیادی سہولیات فراہم کرنے کا مطالبہ

سکھر(بیورورپورٹ)جیئے شاہ ٹاؤن کی یونین کونسل نمبر 9 اور 10 کے علاقے نصیر چنا محلہ، نزد حیدری محلہ میں بنیادی سہولیات کی عدم فراہمی اور دیرینہ مسائل حل نہ ہونے کے خلاف بچوں، نوجوانوں اور بزرگوں سمیت علاقہ مکینوں نے احتجاجی مظاہرہ کیا۔ مظاہرین نے یوسی چیئرمین اظہر علی اعوان کے خلاف شدید نعرے بازی کرتے ہوئے علاقے میں نکاسی آب کا نظام بہتر بنانے، سڑکوں اور راستوں کی تعمیر و مرمت سمیت نالیوں کی صفائی کا مطالبہ کیا۔احتجاجی مظاہرے کی قیادت نصیر احمد چنا نے کی، جبکہ محبوب کھوسو، حاجی سومرو اور دیگر علاقہ مکینوں نے بھی بڑی تعداد میں شرکت کی۔ مظاہرین نے اپنے ہی محلے میں جمع ہوکر منتخب نمائندوں اور متعلقہ انتظامیہ کے خلاف احتجاج ریکارڈ کرایا اور علاقے میں بنیادی سہولیات کی عدم فراہمی پر شدید برہمی کا اظہار کیا۔اس موقع پر مظاہرین کا کہنا تھا کہ نصیر چنا محلے میں عرصہ دراز سے نکاسی آب کا نظام خراب ہے، جس کے باعث علاقہ مکینوں کو روزمرہ زندگی میں شدید مشکلات کا سامنا کرنا پڑ رہا ہے۔ محلے کی سڑکیں، گلیاں، راستے اور نالیاں خستہ حالی کا شکار ہیں، جبکہ بنیادی سہولیات کی عدم فراہمی نے شہریوں کی زندگی اجیرن بنا دی ہے۔مظاہرین نے کہا کہ علاقے کے مسائل حل کرنا منتخب بلدیاتی نمائندوں کی بنیادی ذمہ داری ہے، لیکن افسوس کہ عوام کے ووٹوں سے منتخب ہونے والے نمائندے اپنے وعدے پورے کرنے میں ناکام دکھائی دیتے ہیں۔ ان کا کہنا تھا کہ انتخابات کے دوران ووٹ لینے کے لیے عوام کے پاس آنے والے نمائندے کامیابی کے بعد علاقے کے مسائل سے لاتعلق ہوجاتے ہیں اور شہریوں کو صرف طفل تسلیاں دی جاتی ہیں۔علاقہ مکینوں نے الزام عائد کیا کہ یوسی چیئرمین اظہر علی اعوان نے ووٹ لینے کے بعد علاقے کے دیرینہ مسائل حل کرنے کے لیے کوئی مؤثر اقدامات نہیں کیے، جس کے باعث شہری بنیادی سہولیات سے محروم ہیں۔ انہوں نے کہا کہ نکاسی آب، سڑکوں اور نالیوں کی خستہ حالی کے باعث عوام کو مسلسل پریشانی کا سامنا ہے، مگر متعلقہ حکام کی جانب سے مسائل کے حل پر توجہ نہیں دی جا رہی۔مظاہرین نے مطالبہ کیا کہ یوسی چیئرمین اظہر علی اعوان اور متعلقہ حکام نصیر چنا محلے کے مسائل کا فوری نوٹس لیں، نکاسی آب کے نظام کو درست کیا جائے، خستہ حال سڑکوں اور راستوں کی تعمیر و مرمت کرائی جائے اور نالیوں کی صفائی سمیت دیگر بنیادی سہولیات کی فراہمی یقینی بنائی جائے۔علاقہ مکینوں نے خبردار کیا کہ اگر ان کے جائز مطالبات پر فوری توجہ نہ دی گئی تو احتجاج کا دائرہ وسیع کیا جا سکتا ہے۔ انہوں نے اعلیٰ حکام سے اپیل کی کہ شہریوں کو درپیش مشکلات کا ازالہ کرکے انہیں بنیادی سہولیات فراہم کی جائیں۔