سرگودھا (راجہ نورالہی عاطف سے) سرگودھا پولیس نے انسانیت دوستی اور فلاحِ عامہ کی ایک قابلِ تحسین مثال قائم کرتے ہوئے تھیلیسیمیا کے مرض میں

سرگودھا (راجہ نورالہی عاطف سے) سرگودھا پولیس نے انسانیت دوستی اور فلاحِ عامہ کی ایک قابلِ تحسین مثال قائم کرتے ہوئے تھیلیسیمیا کے مرض میں مبتلا بچوں کے لیے 100 سے زائد بلڈ بیگز عطیہ کر دیے۔ پولیس افسران اور اہلکاروں نے رضاکارانہ طور پر خون کا عطیہ دے کر ان معصوم بچوں کی زندگیوں میں امید کی نئی کرن روشن کردی۔
اس موقع پر پولیس افسران کا کہنا تھا کہ تھیلیسیمیا کے مریض بچوں کو باقاعدگی سے خون کی ضرورت ہوتی ہے اور بروقت خون کی فراہمی ان کی زندگی بچانے میں اہم کردار ادا کرتی ہے۔ سرگودھا پولیس کی جانب سے خون کا عطیہ دینا نہ صرف ایک فلاحی اقدام ہے بلکہ معاشرے کے دیگر طبقات کے لیے بھی انسانیت کی خدمت کا عملی پیغام ہے۔
پولیس افسران نے کہا کہ خون کا عطیہ کسی ایک انسان کی زندگی بچانے کا ذریعہ بن سکتا ہے اور اس سے بڑھ کر کوئی نیکی نہیں کہ کسی ضرورت مند کی زندگی کے لیے اپنا خون عطیہ کیا جائے۔ انہوں نے شہریوں پر بھی زور دیا کہ وہ تھیلیسیمیا سمیت دیگر امراض میں مبتلا مریضوں کے لیے باقاعدگی سے خون عطیہ کریں تاکہ قیمتی انسانی جانوں کو محفوظ بنایا جا سکے۔
شہری، سماجی اور فلاحی حلقوں نے سرگودھا پولیس کے اس انسان دوست اقدام کو سراہتے ہوئے کہا ہے کہ پولیس کی جانب سے 100 سے زائد بلڈ بیگز کا عطیہ ایک قابلِ تقلید مثال ہے۔ انہوں نے امید ظاہر کی کہ ایسے فلاحی اقدامات کا سلسلہ آئندہ بھی جاری رہے گا اور معاشرے کے دیگر ادارے بھی دکھی انسانیت کی خدمت کے لیے اپنا کردار ادا کریں گے۔