نوابشاہ(رپورٹ۔انور عادل خانزادہ)حکومتِ سندھ کے مشیر برائے ماحولیات، موسمیاتی تبدیلی و ساحلی ترقی دوست محمد راہیمون، سیکریٹری ماحولیات، موسمیاتی تبدیلی و ساحلی ترقی زبیر احمد چنہ اور ڈائریکٹر جنرل سیپا وقار حسین پھلپوٹو کی ہدایات پر ریجنل انچارج سیپا شہید بینظیر آباد ڈاکٹر گل امیر سنبل نے سول اسپتال نواب شاہ کے عقب میں غیر قانونی طور پر پھینکے گئے طبی اور میونسپل فضلے کو جلانے کے باعث پیش آنے والے آتشزدگی کے واقعے کا فوری نوٹس لیا۔واقعے کی اطلاع ملتے ہی ڈاکٹر گل امیر سنبل فوری طور پر جائے وقوعہ پر پہنچے اور ریسکیو کارروائی کی خود نگرانی کی۔ آگ کی شدت کے باعث اسپتال کی برقی تاروں اور متعلقہ انفراسٹرکچر کو نقصان پہنچا، جس سے اسپتال کے احاطے، قریبی املاک اور عوامی تحفظ کو سنگین خطرہ لاحق ہو گیا۔صورتحال کی سنگینی کو مدنظر رکھتے ہوئے ڈاکٹر گل امیر سنبل نے فوری طور پر فائر بریگیڈ سے رابطہ کیا، جس نے بروقت موقع پر پہنچ کر آگ پر قابو پا لیا۔ سیپا اور فائر بریگیڈ کی بروقت کارروائی کے باعث ایک بڑے ماحولیاتی اور عوامی تحفظ کے حادثے سے بچاؤ ممکن ہوا اور علاقے کو بڑے نقصان سے محفوظ رکھا گیا۔معائنے کے دوران یہ بات سامنے آئی کہ مذکورہ مقام پر طبی اور دیگر فضلہ غیر قانونی طور پر پھینکا گیا تھا، جس سے شدید ماحولیاتی اور آگ لگنے کے خطرات پیدا ہوئے۔ اس پر متعلقہ سول اسپتال کے میڈیکل سپرنٹنڈنٹ (ایم ایس) کو نوٹس جاری کیا گیا، جس میں فوری طور پر اس مقام پر فضلہ پھینکنے کے عمل کو روکنے اور طبی فضلے کی محفوظ تلفی کے حوالے سے ماحولیاتی قوانین پر سختی سے عملدرآمد کی ہدایت کی گئی۔ڈاکٹر گل امیر سنبل نے کہا کہ طبی فضلے کی غیر مناسب تلفی انسانی صحت اور ماحول کے لیے انتہائی خطرناک ہے۔ انہوں نے خبردار کیا کہ ماحولیاتی قوانین اور ویسٹ مینجمنٹ ضوابط کی خلاف ورزی کرنے والے اداروں یا افراد کے خلاف سخت قانونی کارروائی عمل میں لائی جائے گی۔سیپا ماحولیاتی تحفظ اور عوامی سلامتی کے لیے بروقت معائنہ، نفاذِ قانون اور متعلقہ اداروں کے ساتھ مؤثر رابطے کے ذریعے اپنے عزم پر قائم ہے۔
13
