پیر سید محمد بچل شاہ جیلانی کو پیپلز پارٹی کا ٹکٹ دینے کا مطالبہ
پیر سید محمد بچل شاہ جیلانی کو پیپلز پارٹی کا ٹکٹ دینے کا مطالبہ
سکھر: ضلع خیرپور کے تعلقہ کنگری اور گمبٹ سے تعلق رکھنے والے پاکستان پیپلز پارٹی کے رہنماؤں، کارکنان، سیاسی و سماجی شخصیات نے چیئرمین پاکستان پیپلز پارٹی بلاول بھٹو زرداری سے پرزور اپیل کی ہے کہ پارٹی کے سینئر ترین، دیرینہ اور وفادار رہنما، سابق رکن سندھ اسمبلی اور درگاہ ڈرب میہر شاہ کے سجادہ نشین سینئر ایڈووکیٹ پیر سید محمد بچل شاہ جیلانی کو صوبائی اسمبلی کا ٹکٹ دیا جائے۔
رہنماؤں کا کہنا تھا کہ پیر سید محمد بچل شاہ جیلانی شمالی سندھ میں پیپلز پارٹی کا ایک ایماندار، بے داغ اور عوام دوست چہرہ ہیں، جن کی پوری سیاست خدمت، سچائی اور عوامی اعتماد کے گرد گھومتی ہے۔
انہوں نے کہا کہ پیر بچل شاہ نے سندھ حکومت کے تعاون سے کنگری اور گمبٹ میں 50 سے 60 ترقیاتی اسکیموں کا آغاز کر کے تاریخ رقم کی ہے۔ سڑکوں کی تعمیر و مرمت، تعلیم، صحت، نکاسی آب، پینے کے صاف پانی اور دیہی رابطہ سڑکوں سمیت ان کی کاوشوں سے ہزاروں خاندانوں کے معیارِ زندگی میں نمایاں بہتری آئی ہے، جسے عوام بڑے پیمانے پر سراہ رہے ہیں۔
رہنماؤں نے تشویش کا اظہار کرتے ہوئے کہا کہ چیئرمین بلاول بھٹو زرداری، وزیر اعلیٰ سندھ سید مراد علی شاہ اور ادی فریال تالپور کا مکمل اعتماد حاصل ہونے اور حلقے میں تمام ترقیاتی کام ان کی ذاتی کوششوں سے شروع ہونے کے باوجود پیر سید بچل شاہ کو تاحال صوبائی کابینہ میں شامل نہیں کیا گیا، جس پر وکلاء برادری، مریدین اور سیاسی کارکنان میں بے چینی پائی جاتی ہے۔
درگاہ ڈرب میہر شاہ کے سجادہ نشین کی حیثیت سے پیر سید محمد بچل شاہ جیلانی کو زندگی کے ہر طبقے میں عزت و احترام حاصل ہے۔ سندھ، پنجاب اور بلوچستان بھر میں ان کے مریدین موجود ہیں۔ عوام انہیں ایک ایماندار، ملنسار اور ہر وقت دستیاب رہنما کے طور پر دیکھتے ہیں جو خوشی اور غم میں اپنے لوگوں کے درمیان موجود رہتے ہیں۔
عوام نے مطالبہ کیا کہ پیر محمد بچل شاہ جیلانی کو وزیر اعلیٰ سندھ کا مشیر مقرر کیا جائے تاکہ ضلع خیرپور میں ترقی کے سفر کو مزید تیز کیا جا سکے۔
ساتھ ہی ان سب کا کہنا تھا کہ گذشتہ عام انتخابات میں پیر سید بچل شاہ نے 54 ہزار سے زائد ووٹ حاصل کیے تھے اور انہیں عوام کا واضح مینڈیٹ حاصل تھا، لیکن فارم 47 میں مبینہ بے ضابطگیوں کے باعث انہیں جیت سے محروم کر دیا گیا۔
رہنماؤں کا مزید کہنا تھا کہ شہید ذوالفقار علی بھٹو اور شہید محترمہ بے نظیر بھٹو کے نظریے سے غیر متزلزل وابستگی، پارٹی کے ساتھ دہائیوں پر محیط وفاداری، دیانتدارانہ کردار اور عوامی خدمت کے جذبے نے پیر سید محمد بچل شاہ جیلانی کو عوام کے دلوں میں ایک خاص مقام عطا کیا ہے۔
انہوں نے اعتماد کا اظہار کیا کہ اگر انہیں صوبائی اسمبلی کے رکن اور سندھ حکومت کے حصے کے طور پر موقع دیا گیا تو وہ اسی ایمانداری، لگن اور خدمت کے جذبے کے ساتھ خیرپور کے عوام کی خدمت جاری رکھیں گے۔
