قومی صحافت کے سرمایہ ء افتخار منصور جاوید قریشی کو سالگرہ مبارک خصوصی تحریر: راجہ نورالٰہی عاطف

قومی صحافت کے سرمایہ ء افتخار منصور جاوید قریشی کو سالگرہ مبارک

خصوصی تحریر: راجہ نورالٰہی عاطف

صحافت محض خبر رسانی کا نام نہیں بلکہ یہ معاشرے کی اصلاح، شعور کی بیداری، حقائق کی ترجمانی اور مثبت اقدار کے فروغ کا ایک مؤثر ذریعہ ہے۔ جو لوگ اپنی پیشہ ورانہ زندگی کو سچائی، دیانت، اصول پسندی اور قومی خدمت کے جذبے سے وابستہ کر دیتے ہیں، وہی صحافت کے حقیقی امین اور معاشرے کا قابلِ قدر سرمایہ قرار پاتے ہیں۔ منصور جاوید قریشی بھی ایسی ہی باصلاحیت، باوقار اور قابلِ احترام صحافتی شخصیات میں شمار ہوتے ہیں جنہوں نے اپنی طویل صحافتی جدوجہد کے ذریعے ایک نمایاں مقام حاصل کیا۔
اللہ تعالیٰ نے منصور جاوید قریشی کو اعلیٰ صلاحیتوں، بہترین فہم و فراست اور معاملہ فہمی سے نوازا ہے۔ انہوں نے ان صلاحیتوں کو محض ذاتی کامیابی کے لیے استعمال کرنے کے بجائے شعبۂ صحافت کی بہتری اور وطن عزیز میں مثبت و تعمیری صحافت کے فروغ کے لیے بروئے کار لایا۔ یہی وجہ ہے کہ آج وہ ایک تجربہ کار اور ممتاز سینیئر جرنلسٹ کے طور پر اپنی منفرد شناخت رکھتے ہیں۔
روزنامہ پکارِ امن اسلام آباد کے بطور ایڈیٹر ان کی صحافتی خدمات قابلِ تحسین ہیں۔ ادارت ایک انتہائی ذمہ دارانہ منصب ہے جہاں الفاظ کے انتخاب سے لے کر خبر کے معیار اور ترجیحات تک ہر مرحلے پر بصیرت، تجربے اور ذمہ داری کی ضرورت ہوتی ہے۔ منصور جاوید قریشی نے اس ذمہ داری کو ہمیشہ سنجیدگی اور پیشہ ورانہ انداز میں نبھایا ہے۔ ان کی صحافتی سوچ میں قومی مفاد، معاشرتی اصلاح اور مثبت رویوں کو نمایاں مقام حاصل ہے۔
منصور جاوید قریشی کی شخصیت کا ایک خوبصورت پہلو ان کا شائستہ اور ملنسار مزاج ہے۔ وہ انتہائی ہردلعزیز، پروقار، بردبار، خوش اخلاق اور وسیع القلب شخصیت کے مالک ہیں۔ ان کے یہی اوصاف انہیں صرف علمی، ادبی اور صحافتی حلقوں ہی میں نہیں بلکہ عوامی و سماجی حلقوں میں بھی مقبول بناتے ہیں۔ وہ لوگوں سے خلوص اور احترام کے ساتھ پیش آتے ہیں، یہی وجہ ہے کہ مختلف طبقات سے تعلق رکھنے والے افراد انہیں عزت و احترام کی نگاہ سے دیکھتے ہیں۔
صحافتی میدان میں طویل خدمات کے اعتراف میں انہیں مختلف اعزازات سے بھی نوازا گیا، جو ان کی پیشہ ورانہ صلاحیتوں اور خدمات کا اعتراف ہیں۔ “سلام پاکستان ایوارڈ” ان کے لیے ایک اہم اعزاز ہے۔ اسی طرح راولپنڈی/اسلام آباد یونین آف جرنلسٹس کی جانب سے انہیں ایس آر انٹرنیشنل بیسٹ جرنلسٹ ایوارڈ سے نوازا گیا، جبکہ وہ پی یو ٹی وی بیسٹ پرفارمنس ایوارڈ کے بھی حامل ہیں۔ یہ اعزازات اس امر کی عکاسی کرتے ہیں کہ ان کی صحافتی خدمات کو مختلف سطحوں پر قدر و منزلت کی نگاہ سے دیکھا گیا ہے۔
منصور جاوید قریشی کا شمار نیشنل پریس کلب اسلام آباد کے سینیئر ممبران میں بھی ہوتا ہے۔ ایک صحافتی ادارے سے طویل وابستگی صرف پیشہ ورانہ تجربے کی علامت نہیں بلکہ اس شعبے سے گہری کمٹمنٹ اور مستقل مزاجی کا ثبوت بھی ہے۔ انہوں نے اپنی صحافتی زندگی میں آنے والے مختلف ادوار اور چیلنجز کا سامنا کرتے ہوئے اپنے پیشہ ورانہ سفر کو جاری رکھا اور اپنے اصولوں سے وابستگی برقرار رکھی۔
آج کے دور میں جب صحافت کو مختلف نوعیت کے چیلنجز کا سامنا ہے، مثبت، ذمہ دارانہ اور تعمیری صحافت کی اہمیت پہلے سے کہیں زیادہ بڑھ گئی ہے۔ ایسے ماحول میں منصور جاوید قریشی جیسے سینئر صحافی نئی نسل کے لیے ایک مثال ہیں۔ ان کا سفر نوجوان صحافیوں کو یہ پیغام دیتا ہے کہ صحافت میں کامیابی صرف شہ سرخیوں یا شہرت کا نام نہیں بلکہ کردار، دیانت، مطالعے، تجربے، برداشت اور عوامی خدمت سے عبارت ہے۔
بلاشبہ منصور جاوید قریشی وطن عزیز کی صحافت کے سرمایۂ افتخار ہیں۔ ان کی شخصیت اور خدمات اس بات کی گواہی دیتی ہیں کہ اگر صحافت کو قومی ذمہ داری اور معاشرتی خدمت کے جذبے کے ساتھ اپنایا جائے تو قلم معاشرے میں مثبت تبدیلی کا مؤثر ذریعہ بن سکتا ہے۔ ان دنوں قومی صحافت کے سرمایہء افتخار منصور جاوید قریشی کی سالگرہ کی تقریبات کا سلسلہ جاری ہے۔ ہم انہیں ان کے جنم دن پر دل کی اتھاہ گہرایوں سے مبارکبادیتے ہوءے دعا گو ہیں کہ اللہ تعالیٰ منصور جاوید قریشی کو صحت، سلامتی، عزت، خوش حالی اور مزید کامیابیوں سے نوازے، ان کے علم و قلم میں مزید برکت عطا فرمائے اور انہیں اسی طرح مثبت، بااصول اور تعمیری صحافت کے ذریعے وطن عزیز کی خدمت جاری رکھنے کی توفیق عطا فرمائے۔
ایسے اہلِ قلم معاشرے کا اثاثہ ہوتے ہیں جو خبر کو محض خبر نہیں رہنے دیتے بلکہ اسے شعور، اصلاح اور امید کا ذریعہ بنا دیتے ہیں۔ منصور جاوید قریشی بھی اسی روشن روایت کے ایک معتبر اور قابلِ احترام علمبردار ہیں۔