*فیملی فن گالا میں پہلی بار اراکین کراچی پریس کلب کے بچوں کو اکیڈمک ایکسیلینس ایوارڈ سے نوازا گیا*

*فیملی فن گالا میں پہلی بار اراکین کراچی پریس کلب کے بچوں کو اکیڈمک ایکسیلینس ایوارڈ سے نوازا گیا*

*ان بچوں نے میڑک اور انٹر کے سالانہ امتحانات میں اے ون گریڈ حاصل کیا ہے،اعزازی شیلڈز، فی کس 10 ہزار روپے کیش اور گفٹس تقسیم کئے*

*سالانہ امتحانات میں نمایاں پوزیشن حاصل کرنے والے تمام بچے ہمارا فخر ہیں اور ہم ان کے والدین کو بھی خراج تحسین پیش کرتے ہیں،سعید سربازی، شعیب احمد*

کراچی (رپورٹ: جاوید صدیقی) کراچی پریس کلب کے سالانہ فیملی فن گالا میں پہلی بار اراکین کراچی پریس کلب کے بچوں کو اکیڈمک ایکسیلینس ایوارڈ سے نوازا گیا جنہوں نے سال رواں میں میڑک اور انٹر کے سالانہ امتحانات میں اے ون گریڈ حاصل کیا ہے۔ اے ون گریڈ حاصل کرنے والے چودہ بچوں میں سات بچیاں بھی شامل ہیں۔ تمام ہونہار بچوں میں صدر کراچی پریس کلب سعید سربازی اور سیکریٹری شعیب احمد نے اعزازی شیلڈز، فی کس دس ہزار روپے کیش اور گفٹس تقسیم کئے، اسٹیج پر بچوں کیساتھ ساتھ انکے والدین کو بھی بلایا گیا اور انہیں مبارکباد پیش کی گئی، اس موقع پر صدر کراچی پریس کلب سعید سربازی نے کہا کہ کراچی پریس کلب ہمیشہ اپنے اراکین نے لئے فیملی گالا جیسی میگا سرگرمیاں منعقد کرتا ہے، اپنے اراکین اور انکے اہل خانہ کیلئے سب سے بڑی سرگرمی کرنے کا اعزاز بھی کراچی پریس کلب کو حاصل ہے، سالانہ امتحانات میں نمایاں پوزیشن حاصل کرنے والے تمام بچے ہمارا فخر ہیں اور ہم انکے والدین کو بھی خراج تحسین پیش کرتے ہیں، سیکریٹری کراچی پریس کلب شعیب احمد نے کہا کہ کراچی پریس کلب ہمارا گھر ہے اور گھر کی خوشیوں کو مل کر منانا چاہئے، فیملی گالا کے میگا ایونٹ کے موقع پر ہونہار بچوں کی حوصلہ افزائی اور انکے والدین کیساتھ خوشیوں میں شریک ہونا ہمارے لئے بھی کسی اعزاز سے کم نہیں ہے، یہ ہونہار بچے مستقبل میں پاکستان کی تعمیر ترقی اور خوشحالی میں اپنا کردار ادا کریں گے، کراچی پریس کلب میں مستقبل میں تمام کلاسز میں نمایاں پوزیشن لینے والے بچوں کی حوصلہ افزائی کی کوشش کریں گے، انہوں نے اکیڈمک ایکسیلینس ایوارڈ میں تعاون کرنے پر کراچی گیٹ وے ٹرمینل لمیٹڈ کا شکریہ ادا کیا، اس موقع پر کے جی ٹی ایل کے کمال صدیقی اور مارلین نے بھی بچوں میں خصوصی گفٹس تقسیم کئے۔